Արարատի վերելքին անհրաժեշտ պարագաների ցանկ

Արարատի արշավը հետաքրքիր ճանապարհորդություն է դեպի պատմական Հայաստան և վերելք աշխարհի ամենահայտնի 5000-անոց լեռներից մեկը: Տեխնիկական առումով Արարատն իրենից բարդություն չի ներկայացնում: Այստեղ չկան ժայռոտ հատվածներ, խորը ճեղքերով սառցադաշտեր և վտանգավոր անցումներ: Վերելքի համար անհրաժեշտ է ունենալ ճիշտ հանդերձանք և, իհարկե, արշավային փորձ:

Մասիս լեռան վերելքից առաջ մասնակիցներին հուզող առաջնահերթ հարցերից է արշավային գույքի և հանդերձանքի հարցը: Կիրառելով մեր տարիների փորձը լեռնագնացության մեջ, ստեղծել ենք անհրաժեշտ պարագաների ցանկ, որը կօգնի ձեզ հեշտ կողմնորոշվել: Ցանկը կազմված է հատուկ Մասիսի վերելքի համար: Ի տարբերություն մյուս արշավների այս արշավի ընթացքում ձեր ծանր իրերը տանում եք ոչ թե դուք, այլ ձիերը: Ձեր ուսերին լինելու է միայն թեթև ուսապարկ:

Եկեք բաժանենք իրերի ամբողջ ցուցակը երեք մասի․

• հանդերձանք և հիմնական գույք
• ճամբարի և գիշերակացի համար անհրաժեշտ իրեր
• լրացուցիչ իրեր և էլեկտրոնիկա

Հանդերձանք և հիմնական գույք

Մեծ ուսապարկ կամ սպորտային պայուսակ (70-90 լ)

Մեծ ուսապարկի կամ սպորտային պայուսակի մեջ լինելու են այն իրերը, որոնք տեղափոխվելու են ձիերով:

Փոքր ուսապարկ (25-40 լ)

Փոքր ուսապարկը միշտ լինելու է ձեր ուսերին: Այստեղ են գտնվելու ճամբարից ճամբար հասնելու համար ձեզ անհրաժեշտ իրերը՝ ջուր, քաղցրավենիք, անհատական դեղատուփ, բաճկոն և այլն: 

Թերմոներքնազգեստ

Թերմոներքնազգեստի կոմպլեկտ՝ սա հատուկ գերշնչող նյութերից պատրաստված շապիկ և տաբատ է, որը հագնում են անմիջապես մարմնին: Այն լավ ներծծում է քրտինքը և արագ չորանում: Արդյունքում մարմինը մնում է չոր և հետևաբար ավելի տաք:

Ֆլիսե վերնազգեստ

Այս գործվածքը նաև անվանում են արհեստական բուրդ: Ֆլիսն առավել թեթև ու փափուկ է քան բուրդը: Եվ, ի տարբերություն բրդյա շապիկի, ֆլիսե վերնազգեստն անգամ թրջվելուց հետո շարունակում է որոշ չափով տաք պահել մարմինը:

Տաբատ

Մինչև երկրորդ ճամբարը (4200 մ Մասիս) կարող եք բարձրանալ թեթև տաբատով: Դեպի գագաթ վերելքի ժամանակ պետք է ունենաք  քամուց ու ցրտից պաշտպանող ալպինիստական տաբատ կամ դահուկորդի համազգեստ: Այն պետք է լինի անջրաթափանց, տաք, մեմբրանե շերտով: Տաքացնող նյութը կարող է լինել բնական՝ սագի փետուր, կամ սինթետիկ: Բնականը ավելի լավ է տաքացնում, ավելի թեթև է: Նույնքան տաքացնող սինթետիկը ավելի ծանր է, որպես կանոն, բայց նաև ավելի էժան: Առաջնորդվեք ըստ ձեր նախապատվության: Մեմբրանե շերտն էլ միաժամանակ և՛ անջրաթափանցություն է ապահով, և՛ շնչում: Սա ոչ պարտադիր, բայց ցանկալի պայման է:

Բաճկոն

Անհրաժեշտ է ունենալ 2 բաճկոն: Մեկը թեթև՝ քայլքի համար, մյուսը՝ ձմեռային բաճկոն, որը կպաշտպանի քամուց և ցածր ջերմաստիճանից: Բաճկոնը անպայման պետք է ունենա  քամուց և անձրևից պաշտպանող գլխարկ:

Շապիկ

Անհրաժեշտ է ունենալ տարբեր հաստությունների մի քանի շապիկ։

Արևապաշտպան գլխարկ

Տաք գլխարկ

Ձմեռային գլխարկ (2 հատ)

Buff

Բաֆերը պաշտպանում են ինչպես քամուց ու փոշուց այնպես էլ ձնից ու ցրտից: Քայլելու ժամանակ Buff-ը պաշտպանում է վիզը և կանխում է քամու ներթափանցումը: Ուժեղ քամու ժամանակ այն քաշում եք վերև և ծածկում դեմքը:

Ձեռնոց

Ֆլիսե ձեռնոցներ (2 զույգ)։ Մի զույգը մատներով, իսկ մյուսը՝ թաթման: Դահուկի ձեռնոցը նույնպես կարելի է վերցնել: Կարևորը որ արտաքնից ունենա ջրակայուն պինդ շերտ, իսկ ներսից՝ փափուկ տաքացնող շերտ:

Արևային ակնոց

Արևային ակնոցը պետք է լինի տուրիստական կամ լեռնային՝ առնվազն 3-րդ կատեգորիայի պաշտպանությամբ: Արևային ակնոցների ապակիներն ունեն դասակարգում: Առաջին և երկրորդ կատեգորիաները նախատեսված են քաղաքի և թեթև զբոսանքի համար, և մեզ այս դեպքում անհրաժեշտ չեն: Երրորդ կատեգորիան փոխանցում է արևի լույսի 8-18%-ը, 4-րդը՝ 3 – 8%-ը: Քանի որ Արարատում ամռանը ձյունը շատ չէ, ապա երրորդ կատեգորիան լրիվ բավարար է:

Անձրևանոց

Ճանապարհին կարող են լինել տեղումներ:

Գուլպա

Արշավային բրդյա գուլպաներ՝ լինում են կամ սինթետիկ, կամ մերինոյի բրդից: Այս կենդանիների բուրդը թեթև է և շատ տաք, արագ կլանում է քրտինքը և չորանում: Այսպիսի գուլպաները ունենում են անատոմիական ձև, հաճախ անկար գործվածքով: Ցանկալի է ունենալ մի քանի զույգ տարբեր հաստության գուլպաներ:

Արշավային ոտնամաններ

Ոտնամանները պետք է լինեն հարմար, հաստ տակացույով և չսեղմող: Սովորոբար ոտնամաններն ընտրում են այն հաշվարկով, որ հագնեն հաստ գուլպայով, այսինքն՝ մի կամ երկու համար մեծ: Արշավից առաջ անպայման հագեք, որպեսզի բացվի և ընդունի ձեր ոտքի ձևը: Արգելվում է նոր ոտնամաններով սկսել վերելքը: Մենք խորհուրդ ենք տալիս գնել հատուկ լեռնագնացության համար նախատեսված կոշիկներ Zamberlan, Lowa, Scarpa, Asolo, LaSportiva ֆիրմաների: Ցանկալի է ունենալ հատուկ լեռնային կոշիկներ, որոնք նախատեսված են կատվիկ հագցնելու համար:

Փոխնորդ ոտնամաններ

Մասիսի վրա  մինչև երկրորդ ճամբարը (4200 մ) կարող եք հագնել ավելի թեթև ոտնամաններ (հաստ տակացույով):

Արշավային ձեռնափայտեր

Արշավային ձեռնափայտեր՝ կիսում են ոտքերի լարվածությունը՝ թեթևացնելով քայլքը:

Ճամբարի և գիշերակացի համար իրեր

Քնապարկ

Քնապարկ՝ ունենում են ջերմաստիճանի երեք ցուցանիշ՝ կոմֆորտ, մինիմում և էքստրեմալ: Կոմֆորտը ցույց է տալիս օդի այն ջերմաստիճանը, որի պայմաններում ամենանպատակահարմարն է տվյալ քնապարկը, իսկ էքստրիմը՝ նվազագույնը, որի դեպքում կյանքին լուրջ վտանգ չի սպառնա: Արարատի համար ընտրեք այնպիսի քնապարկ, որի կոմֆորտը լինի -5 ից -10։ Երկրորդ ճամբարում վրանի մեջ օդի ջերմաստիճանը կարող է հասնել 0 աստիճանի:

Հողաթափեր

Կեդեր, հողաթափեր կամ նմանատիպ թեթև ոտնաման ճամբարում ոտքերը հանգստացնելու համար:

Լրացուցիչ իրեր և էլեկտրոնիկա

Թերմոս (0,5 լիտր)

Գագաթի ճանապարհին ջուրը սառում է ջրամանի մեջ: Այդ իսկ պատճառով պարտադիր պետք է ունենալ թերմոս, որպեսզի ցուրտ ժամանակ տաք թեյ կամ գոլ ջուր խմեք:

Ճակատային լապտեր (մի քանի զույգ մատկոցներով)

Քանի որ վերելքը սկսում ենք գիշերը ժամը 1-ին պետք է պարտադիր ունենալ ճակատային լապտեր: Արշավից առաջ անպայման ստուգեք մարտկոցները: Վերջին օրը այն պետք է ծառայի 5 ժամ մինչև լուսաբաց:

Power bank առնվազն 10.000 միլիամպեր/ժամ ուժով

Արարատի վերելքը տևում է մի քանի օր: Նաև հաշվի առնելով լեռներում փոփոխվող եղանակային պայմանները՝ հեռախոսի լիցքավորումը կարող է ավելի արագ սպառվել: Անպայման ձեզ հետ power bank վերցրեք, առնվազն 10.000 միլիամպեր/ժամ ուժով, որպեսզի կարողանաք երկար օգտվել ձեր հեռախոսից:

Անհատական դեղատուփ

Դեղատուփի պարունակությանը ծանոթացեք այստեղ։ Հղումով բացվող նյութում փորձել ենք հավաքագրել բոլոր հիմնական դեղամիջոցներն ու իրերը, որ պարտադիր պետք է լինեն ձեր անհատական առաջին օգնության հավաքածուի մեջ: 

Կարևո՛ր է․ հնարավոր է, որ ոմանք ունենան ալերգիա որոշ դեղամիջոցների կամ նյութերի հանդեպ: Այստեղ ներկայացված ցուցակը բացարձակ չէ: Համոզվե՛ք, որ չունեք ալերգիա որևէ դեղամիջոցից, մինչ այն ընդունելը, և ուրիշին դեղահաբ առաջարկելուց առաջ համոզվեք, որ նա նույնպես ալերգիկ չէ:

 

Այլ պարագաներ

• Ներքնազգեստ
• Հեռախոս
• Անձնագիր, դրամապանակ և այլ կարևոր փասթաթղթեր՝ այս ամենը կեղտոտվելուց կամ թրջվելուց ապահով պահելու համար կարելի է պահել պինդ զիպ փականով պատյանների մեջ
• Ֆոտոխցիկ
• Լողազգեստ
• Ուսապարկի պաշտպանիչ ծածկոց կամ պոլիէթիլենային տոպրակներ իրերի փաթեթավորման համար
• Անձնական հիգիենայի պարագաներ
• Ջրաման
• Հիգիենիկ շրթներկ
• Արևապաշտպան քսուք կամ սփրեյ առնվազն 50spf պաշտպանության մակարդակով

Արարատի վերելքի ընթացքում արևապաշտպան ու շուրթերը փափկացնող քսուկները պարտադիր են, քանի որ վերելքի մեծ մասն անցնելու է կիզիչ արևի տակ:

Վերելք Արարատ 2024

Սույն հոդվածի հեղինակային իրավունքը պատկանում է armgeo.am կայքին։ Հոդվածի բովանդակությունը կարող է մեջբերվել, օգտագործվել այլ կայքերում, միայն ակտիվ հղում պարունակելով դեպի սկզբնաղբյուրը:

Բլոգ Հայաստանի մասին