Ջրագրություն - Armenian Geographic - ArmGeo.am

Թաքնված ջրվեժ

armeniangeographic — Tue, 14 Nov 2023 14:29:08 +0000

Թաքնված ջրվեժը գտնվում է Տավուշի մարզում՝ Իջևանի անտառածածկ լեռների լանջերին և մտնում է «Դիլիջան ազգային պարկի» տարածքի մեջ։ Համեմատած այլ ջրվեժների, այն ավելի փոքր է։ Ջրի հոսքը թափվում է մոտավորապես 2․5 մ բարձրությունից:

Դեպի Թաքնված ջրվեժ տանող ճանապարհը

Ջրվեժ տանող ճանապարհն անցնում է սաղարթախիտ անտառի միջով։ Դեպի Դիմաց լեռ իրականացվող արշավի ընթացքում գրեթե միշտ քայլում ենք դեպի Թաքնված ջրվեժ, որից հետո շարունակում ենք քայլել դեպի Դիմաց լեռան գագաթ։

Սույն հոդվածի հեղինակային իրավունքը պատկանում է armgeo.am կայքին։ Հոդվածի բովանդակությունը կարող է մեջբերվել, օգտագործվել այլ կայքերում, միայն ակտիվ հղում պարունակելով դեպի սկզբնաղբյուրը:

Առաջիկա արշավներ

Պարզ լիճ

armeniangeographic — Fri, 27 Oct 2023 12:56:42 +0000

Պարզ լիճը գտնվում է Տավուշի մարզում, Արեգունի լեռների հյուսիսարևմտյան՝ անտառապատ լանջերին, ծովի մակարդակից 1334 մ բարձրության վրա: Մակերեսը` շուրջ 0,03 ք․կմ, միջին խորությունը` 7 մ:

Լիճը շրջապատված է խիտ անտառներով, իսկ նրա ափերի երկայնքով ծառերը արտացոլվում են ջրի մակերեսին: Սնվում է աղբյուրներով և տեղումներով։

Պարզ լիճը գեղեցիկ է տարվա ցանկացած ժամանակ և ցանկացած եղանակին, բայց աշնանը հատկապես տպավորիչ է վառ գույներով։ Լճի շրջակայքում կան նաև շատ հետաքրքիր վայրեր, որտեղ կարելի է այցելել։ Մոտակայքում կան հայտնի վանքեր, ինչպիսիք են Հաղարծինը, Գոշավանքը, Ջուխտակը և Մաթոսավանքը։

Առաջիկա արշավներ

Ակնա լիճ

armeniangeographic — Fri, 08 Sep 2023 06:43:23 +0000

Ակնա լիճ կամ Ակնալիճը գտնվում է Գեղարքունիքի և Կոտայքի մարզերի սահմանագլխին՝ Գեղամա լեռների կենտրոնական կատարային մասում, ծովի մակերևույթից 3032 մ բարձրության վրա: Մակերեսը` 0,8 ք․կմ է , խորությունը` 15 մ:

Լիճը սնվում է ձնհալքի և աղբյուրների ջրերով։ Այն շրջապատված է երիտասարդ հրաբխային կոներով և ալպյան հրաշագեղ մարգագետիններով։ Լճի ջուրը պարզ է, անուշահամ։ Լճի հայելում արտացոլվում են շրջակա լեռները և երկնքի կապույտը։

Ակնա լիճ

2008 թվականից լիճը ներառվել է բնության պետական հուշարձանների ցանկում։

Լիճը շրջապատված է Գեղամա լեռնագագաթներով (Ակնասար, Նարինե, Շուշան, Շամփրասար, Քարհանք, Աղուսար և այլն), որոնք արտացոլվում են լճի ջրերում՝ այն դարձնելով էլ ավելի գեղեցիկ:

Առաջիկա արշավներ

Ջերմուկի հանքային աղբյուրներ

armeniangeographic — Mon, 21 Aug 2023 13:18:17 +0000

Ջերմուկի հանքային աղբյուրներ բնական հուշարձանը գտնվում են քաղաքից 5 կմ հեռավորության վրա՝ լեռներում։ Ունեն բուժիչ հատկություն, որի մասին հիշատակվել է դարեր առաջ: Գեյզերում նվազագույն ջերմաստիճանը 32 աստիճան է, ինչը հնարավորություն է տալիս հանգիստ լողալ և միաժամանակ վայելել մաքուր, լեռնային օդը։ Գեյզերն ինքնին բնական ջակուզի է` տաք հանքային ջրով, որը դուրս է ժայթքում 2-ից 7 րոպեն մեկ հաճախականությամբ: Խորհուրդ է տրվում ջրում մնալ ոչ ավել, քան 5 րոպե, ապա ընդմիջում կատարել:

Ջերմուկի հանքային աղբյուր

Գտնվում է ծովի մակարդակից 2140 մ բարձրության վրա և գրանցված է Հայաստանի բնության հուշարձանների ցանկում։

Հանքային ջրի հայտնաբերման մասին նույնիսկ լեգենդներ են հյուսվել: Վաղուց, երբ մարդու ապրուստի հիմնական միջոցը որսորդությունն էր, այս կուսական անտառները լի էին ամենատարբեր որսատեսակներով: Եվ ահա, մի անգամ, փորձառու որսորդը նետահարում է երիտասարդ եղնիկին:

Վիրավոր եղնիկը փախչում է և հասնում Ջերմուկի հանքային աղբյուրներին։ Եղնիկը նետվում է ջուրը, և այն, ինչ տեսնում է որսորդը, ուղղակի հրաշք էր. Եղնիկը ջրից դուրս է գալիս ամբողջովին ապաքինված և բոլորովին առողջ։ Որսորդն ապշում է այս հասարակ ջրի կատարած հրաշքից։ Այդ օրվանից Ջերմուկ ջրի համբավը տարածվում է ամբողջ աշխարհով, իսկ հրաշք ջրի գաղտնիքը մարդկանց հասցրած եղնիկը դառնում է ժողովրդի սիրելին և Ջերմուկ քաղաքի խորհրդանիշը։

Առաջիկա արշավներ

Ջերմուկի ջրվեժ

armeniangeographic — Mon, 21 Aug 2023 10:47:22 +0000

Ջերմուկի կամ «Ջրահարսի վարսեր» ջրվեժը գտնվում է Վայոց Ձորի մարզում՝ Ջերմուկ քաղաքում` Արփա գետի աջակողմյան Ջերմուկ վտակի վրա։ Սկզբնավորվում է աղբյուրներից, մոտ 68 մ բարձրությունից 3 գմբեթաձև դարավանդներով թափվում Արփա գետ։

Ջերմուկի ջրվեժ

Ջրվեժի մասին կա մի հետաքրքիր ավանդություն, իբրև ջրվեժի վերևի հատվածում, ուղղաձիգ ժայռերի վրա գտնվում էր մի իշխանի ամրոց, որն ուներ շատ գեղեցիկ դուստր, նրա ձեռքը խնդրելու էին գալիս աշխարհի տարբեր ծայրերից: Գեղեցկուհին մերժում էր բոլորին, քանի որ նրա սիրտը պատկանում էր քաջարի ու գեղեցիկ մի երիտասարդի` հովվի որդուն: Աղջիկն ամեն օր կեսգիշերից հետո, իր ննջարանի լուսամուտից ձորն էր նետում մի երկար պարան, որով հովվի որդին խորը կիրճից բարձրանում էր իր մոտ:

Ջերմուկի ջրվեժ

Երբ օրերից մի օր իշխանը գտնում է պարանը, նրա համար ամեն ինչ պարզ է դառնում: Զայրույթի պահին հայրը անիծում է աղջկան ասելով. «Եթե մեկ էլ հանդիպես հովվի որդուն, ջրահարս դառնաս ու երբեք ջրից դուրս չգաս»: Աղջիկը հերթական հանդիպման ժամանակ, որպեսզի սիրեցյալին օգնի բարձրանալ իր դղյակը, պարանի փոխարեն ժայռի բարձունքից կախում է իր երկար վարսերը: Սակայն նույն ակնթարթին իրականանում է հոր անեծքը. գեղեցկուհին դառնում է ջրահարս, իսկ կիրճ թափվող նրա գեղեցիկ վարսերը դառնում են ջրվեժ, որին ժողովուրդը անվանում է «Ջրահարսի վարսեր»:

Ծանոթացեք նաև մեր Հայաստանի ջրվեժները հոդվածին։

Առաջիկա արշավներ

Շաքիի ջրվեժ

armeniangeographic — Mon, 21 Aug 2023 09:08:35 +0000

Շաքիի ջրվեժ ՝ գտնվում է Սիսիան քաղաքից 3 կմ դեպի հյուսիս-արևմուտք, Շաքի գետի վրա: Գետը Որոտանի վտակներից մեկն է: Ջրվեժի բարձրությունը 18 մետր է: Հայաստանի ամենասիրված վայրերից է զբոսաշրջիկների համար:

Շաքիի ջրվեժ

Ջրվեժի անվան հետ կապված կա առասպել: Ըստ ավանդության թշնամիները Գեղարքունի գավառից 93 գեղեցիկ աղջիկ են ուղարկում Մուղանում բանակ դրած իրենց առաջնորդին: Երբ գերի աղջիկների քարավանը հասնում է այստեղ, դիմելով իրենց առևանգիչներին` նրանք ասում են. «Մենք երկար ճանապարհին շատ փոշոտվել ու կեղտոտվել ենք, թույլ տվեք գետում լողանանք, նոր ներկայանանք ձեր մեծերին»:

Հայաստանի ջրվեժները

Առևանգիչները համաձայնում են: Աղջիկները մերկանալով նետվում են Որոտանի ալիքների մեջ և սուզվելով` անհետանում: Միայն Շաքե անունով մի կապուտաչյա աղջիկ, Որոտանը թափվող գետակի միջով փախչելով, փորձում է ազատվել:

Թշնամիները հասնում են նրա հետևից, սակայն նույն վայրկյանին գետակի մեջ հրաշքով մի ժայռ է խոյանում, և ջուրը, նրա վրայով գահավիժելով, իր ճերմակ փրփուրների տակ թաքցնում է Շաքեին: Դրանից հետո այդ ջրվեժն ու նրա մոտ գտնվող գյուղը կոչվում են Շաքեի անունով:

Մեկ այլ ավանդություն ասում է․

Շաքին մի գեղեցիկ աղջիկ է եղել, նա այնքան գեղեցիկ է եղել, որ նրա գեղեցկությանը չի դիմացել մեր երկիրը նվաճելու եկած արաբ զավթիչներից մեկը, սիրահարվել է Շաքիին: Զավթիչը հրամայել է աղջկան գալ իր մոտ, Շաքին էլ չի հնազանդվել ու իրեն նետել է բարձունքից ցած: Այդ պահին նրա հագուստի ճերմակ փեշերը տարածվել են ու դարձել ջրվեժ:

Առաջիկա արշավներ

Քարի լիճ

armeniangeographic — Mon, 21 Aug 2023 08:29:40 +0000

Քարի լիճը գտնվում է Արագածոտնի մարզում, Արագած լեռան վրա, ծովի մակերևույթից 3200 մ բարձրության վրա:

Մակերեսը` 0,3 ք․կմ է, խորությունը՝ 9 մ: Այն Արագածի տասնյակ բարձրալեռնային լճերից մեկն է: Լիճն առաջացել է սառցե գոյացություններից։ Քարի լճի արևմտյան ափից սկիզբ է առնում Արքաշեն գետը։

Քարի լիճ

Լճի հարավային ափին է գտնվում Խորհրդային Միության տարիներին հիմնած ֆիզիկայի գիտահետազոտական կենտրոնի բազայի վրա գործող Արագած տիեզերական ճառագայթների հետազոտական կայանը, որը 1942 թվականին հիմնել են Արտեմ Ալիխանյան և Աբրահամ Ալիխանով եղբայրները։

Կայանի ջրամատակարարումն ապահովելու նպատակով լճի հարավային արտահոսքը փակվել է բետոնե պատով, որի հետևանքով բարձրացել է լճի մակարդակը և ամբարված ջուրը բավարարում է կայանի կարիքները ողջ տարվա ընթացքում։

Առաջիկա արշավներ

Հորսի լիճ

armeniangeographic — Fri, 18 Aug 2023 12:24:17 +0000

«Հորսի լիճ» ջրամբարը գտնվում է Վայոց Ձորի մարզում, Հորս գյուղից 2 կմ հարավ-արևմուտք:

Հորսի լիճ

Գտնվում է ծովի մակերևույթից 2090 մ բարձրության վրա։ Այստեղից շատ սիրուն տեսարան է բացվում դեպի Քարկատարի լեռները։

Առաջիկա արշավներ

Գոշի լիճ

armeniangeographic — Fri, 18 Aug 2023 08:10:40 +0000

Գոշի լիճը գտնվում է Տավուշի մարզում, Արեգունի լեռների հյուսիսային լանջերին։ Գտնվում է ծովի մակարդակից 1398 մ բարձրության վրա:

Լճի երկարությունը կազմում է 100 մ, լայնությունը՝ 80 մ։ Միջին խորությունը հասնում է մինչև 8մ:

Գոշի լիճ

Սնվում է աղբյուրների և մթնոլորտային տեղումների ջրերով։ Լիճն անվանակոչել են ի պատիվ միջնադարյան հայ մտածող–գիտնական ու հասարակական գործիչ Մխիթար Գոշի:

Առաջիկա արշավներ

Ուրասարի կամ Ջրաշուշանների լիճ

armeniangeographic — Thu, 17 Aug 2023 14:03:16 +0000

Ջրաշուշանների լիճը գտնվում է Լոռու մարզի Ուրասար գյուղից 1․2 կմ հյուսիս-արևելք։

Ջրաշուշանը Հայկական լեռնաշխարհի ամենագեղեցիկ բույսերից է։ Գրանցված է ՀՀ Կարմիր գրքում և խստիվ ԱՐԳԵԼՎՈՒՄ Է այն քաղել:

Ուրասարի կամ Ջրաշուշանների լիճ / Լուսանկարները՝ Քրիս Պողոսյանի

Ջրաշուշանների ծաղկման շրջանը կարճատև է։ Ծաղկում են միայն ամռան՝ հուլիս – օգոստոս ամիսներին:

Սպիտակ ծաղիկներով ջրաշուշանները դարձել են չափազանց հազվադեպ հանդիպող։ Աճում են Լոռու մարզի կանգուն և դանդաղահոս լճերում։

Միացիր մեր արշավին դեպի Ջրաշուշանների լիճ

Արշավ դեպի Ջրաշուշանների լիճ