Գոյատևում - Armenian Geographic - ArmGeo.am

Բժշկական հակացուցումներ արշավների ժամանակ

armeniangeographic — Thu, 09 Jan 2025 14:12:00 +0000

Սպորտը և արշավներն առողջ ապրելակերպ վարելու լավագույն միջոցներից են։ Ինչպես տարբեր սպորտաձևերում, այնպես էլ արշավների ժամանակ պետք է խիստ ուշադրություն դարձնել մեր առողջական վիճակին: Կան հստակ բժշկական հակացուցումներ, որոնց պարագայում չի թույլատվում մասնակցել արշավների և լեռնային վերելքների: Հաճախ արշավները ուղեկցվում են օրգանիզմում սթրեսի ավելացմամբ և ֆիզիկական ծանրաբեռնվածությանբ: Այս գործոնները հաշվի առնելով՝ ներկայացնում ենք բժշկական հակացուցումների ցանկ, որոնց առկայության պարագայում խորհուրդ չի տրվում արշավների մասնակցել:

Ունեք առողջական խնդիր, բայց ցանկանում եք մասնակցել արշավի՞

Հնարավոր է մասնակցել արշավների, նույնիսկ որոշ առողջական խնդիրների դեպքում։ Սակայն այն պարագայում, եթե Դուք լիովին ի վիճակի եք ինքնուրույն վերահսկել հիվանդության ընթացքը և այն չի խանգարում ակտիվ կյանքով ապրելուն:

Ահա մի քանի խորհուրդ, եթե ունեք որևէ առողջական խնդիր, բայց որոշել եք մասնակցել արշավի:

Համոզվեք, որ ձեր խնդիրը սրացման փուլում չէ և դուք լիովին վերահսկում եք այն
Նախապես զգուշացրեք մեր աշխատակցին ձեր խնդրի մասին, նախքան արշավին գրանցվելը
Զրուցեք Ձեր բժշկի հետ և համոզվեք, որ Ձեր առողջական վիճակը համապատասխան է տվյալ արշավին մասնակցելու համար
Ձեզ հետ ունեցեք բավարար քանակությամբ անհրաժեշտ դեղամիջոցներ, որոնք պետք է ընդունեք սրացման դեպքում
Ձեռք բերեք դժբախդ պատահարներից ապահովագրություն ակտիվ հանգստի համար: Այն հատուցում է ապահովագրված անձի կամքից անկախ տեղի ունեցած հանկարծակի, արտաքին ազդեցության հետևանքով անձի կյանքին կամ առողջությանը հասցված վնասները: Ապահովագրություն կարող եք ձեռք բերել Լիգա ինշուրանս, Նաիրի ինշուրանս, Ռեգո ինշուրանս կամ այլ ապահովագրական կազմակերպություններից

Բժշկական հակացուցումներ

Ինչպես և նշեցիք, կան հստակ բժշկական հակացուցումներ, որոնց առկայության դեպքում խստիվ արգելվում է մասնակցել արշավների: Եթե ունեք ստորև նշված խնդիրներից որևէ մեկը, ապա վտանգի մի ենթարկեք ձեր առողջությունը և խուսափեք արշավների մասնակցությունից:

Պետք է խուսափել արշավների մասնակցությունից, եթե առկա են հետևյալ խնդիրները՝

Սրացման փուլում գտնվող ցանկացած հիվանդություն
Հոգեկան հիվանդություններ, որոնք դժվարացնում են մարդու հետ շփումը
Ցավային համախտանիշով չարորակ նորագոյացություններ
Անգինա
Լյարդի հիվանդություններ (սուր և սրացող հեպատիտ, լյարդի անբավարարության այլ հիվանդություններ)
Էնդոկրին գեղձերի հիվանդություններ
Ոչ լրիվ վերահսկման փուլում գտնվող շաքարային դիաբետ

Երիկամային հիվանդություններ (սրացման փուլում գտնվող երիկամային բորբոքում, երիկամային անբավարարություն)
Թրոմբոֆլեբիտ կամ երակի պատի բորբոքում, Թրոմբոզ
Արնահոսություններ
Գլաուկոմա տեսանյարդի հիվանդություն
Սիֆիլիս
Հղիություն
Օրգանիզմի ցանկացած հատվածում ընթացող թարախային պրոցեսներ
Էպիլեպսիա
Անհայտ պատճառով երկարատև ջերմություն
Հոդերի հիվանդություններ (ծնկի և միջողային հոդերի անկիլոզ, դեֆորմացվող օստեոարթրիտ՝ ֆունկցիայի զգալի բացակայությամբ, հոդերի և ոսկորների տուբերկուլյոզ)

Սրտանոթային համակարգի հիվանդություններ

Արշավների չի կարելի մասնակցել սրտանոթային խնդիրներ ունեցող մարդկանց, քանի որ արշավը կարող է առաջացնել սրտամկանի ավելորդ լարում, խոչընդոտել սրտի բնականոն աշխատանքին: Սա լուրջ հետևանքներ կարող է ունենալ: Հետևաբար, սրտանոթային խնդիրներ ունեցողները պետք է խուսափեն ծանր ֆիզիկական ակտիվությունից, հատկապես արշավներից, առանց բժշկի թույլատվության։

Բժշկական հակացուցումներ

Պետք է խուսափել արշավների մասնակցությունից, եթե առկա են հետևյալ խնդիրները՝

Սրտի իշեմիկ հիվանդություն
Ոչ պակաս, քան 6 ամիս առաջ ունեցած սրտամկանի ինֆարկտ
Սրտի և աորտայի անևրիզմա
Խոշոր անոթների անևրիզմա
Արյան շրջանառության անբավարարության IIԱ և ավելի բարձր փուլեր,
Սրտի առիթմիեա
3-րդ աստիճանի հիպերտոնիա (180/110 մմ Hg-ից բարձր ճնշում)

Շնչառական համակարգի հիվանդություններ

ֆիզիկական ծանրաբեռնվածությունը մեծացնում է շնչառական համակարգի բեռը։ Արշավները, հատկապես լեռնային վերելքները, պահանջում են թթվածնի հավելյալ քանակություն, ինչը կարող է խնդրահարույց լինել այն մարդկանց համար, ովքեր ունեն ասթմա, բրոնխիտ կամ այլ շնչառական խնդիրներ: Նույնիսկ շնչառական խնդիրներ չունեցիող անձինք պետք է նախապատրաստեն իրենց օրգանիզմը, եթե պլանավորել են կատարել 5000+ վերելք: Այդ մասին ավելի մանրամասն կարող եք կարդալ «Կլիմայավարժեցումը լեռներում» հոդվածում:

բժշկական հակացուցումներ

Պետք է խուսափել արշավների մասնակցությունից, եթե առկա են հետևյալ խնդիրները՝

Ասթմատիկ կարգավիճակով բրոնխիալ ասթմա
2-3 աստիճանի բրոնխեեկտազիա
2-3 աստիճանի շնչառական անբավարարություն (շնչառության պակաս 28 րոպեից ավելի հանգստի ժամանակ)
Հեմոպտիզ
Բույսերի և փոշու սուր ալերգիաներ
Տուբերկուլյոզի ակտիվ ձև

Արյան հիվանդություններ

Բարձրլեռնային պայմաններում օդում թթվածնի մակարդակը նվազում է, ինչը կարող է խնդիրներ առաջացնել՝ հատկապես այն մարդկանց համար, ովքեր ունեն արյան հիվանդություններ, օրինակ՝ անեմիա (արյան կարմիր բջիջների պակաս): Նրանց օրգանիզմն արդեն դժվարությամբ է ապահովում հյուսվածքները թթվածնով, և նման պայմաններում խնդիրները կարող են խորանալ: Արշավի ընթացքում հնարավոր են վնասվածքներ, որոնց դեպքում արյունահոսությունը դժվար կլինի վերահսկել, եթե մարդը ունի արյան մակարդելիության խանգարումներ (օրինակ՝ հեմոֆիլիա): Այսպիսի իրավիճակներում անգամ փոքր վերքը կարող է մեծ խնդիր դառնալ:

բժշկական հակացուցումներ

Եթե մարդը ունի արյան հիվանդություն, որը թուլացնում է նրա իմունային համակարգը (օրինակ՝ լեյկոզ), ապա նրա օրգանիզմը դժվարությամբ է հաղթահարում շրջակա միջավայրի վարակի աղբյուրները (տարբեր վիրուսներ, բակտերիաներ), որոնք կարող են հանդիպել արշավի ժամանակ:

Պետք է խուսափել արշավների մասնակցությունից, եթե առկա են հետևյալ խնդիրները՝

Միջին և ծանր անեմիա
Թրոմբոցիտոպենիկ պուրպուրա
Հեմոֆիլիա
Լեյկոզ և արյան համակարգի այլ չարորակ հիվանդություններ

Ստամոքսաաղիքային հիվանդություններ

Ֆիզիկական ակտիվությունը կարող է բարդացնել ստամոքսի և աղիների հիվանդությունների ընթացքը: Օրինակ, խոցի դեպքում կարող է ուժեղանալ ցավը, իսկ գերհոգնածությունը կարող է առաջացնել աղիքային սպազմներ։ Արշավների ժամանակ նաև լինում են օրգանիզմի ջրազրկման դեպքեր, ինչը կարող է հատկապես վտանգավոր լինել լյարդի կամ աղիների քրոնիկ հիվանդություններ ունեցող մարդկանց համար։

Բժշկական հակացուցումներ

Պետք է խուսափել արշավների մասնակցությունից, եթե առկա են հետևյալ խնդիրները՝

Գաստրիտ
Սուր պեպտիկ խոց (վերջին 3 շաբաթվա ընթացքում ցավի, մշտական սրտխառնոցի, պարբերաբար փսխման կամ արյունահոսության առկայություն)
Փորլուծություն կամ փսխում` արշավին նախորդող 3 օրերի ընթացքում (բացառությամբ սննդային թունավորումների)

Եթե ունեք առողջական խնդիրներ, անպայման խորհրդակցեք Ձեր բժշկի հետ՝ Ձեր վիճակը ճիշտ գնահատելու և անհրաժեշտ միջոցառումները նախապես պլանավորելու համար:

Հիշեք՝ Ձեր առողջությունն առաջնային է, և նույնիսկ ամենագեղեցիկ արշավի համար չարժե վտանգի ենթարկել Ձեր կյանքն ու անվտանգությունը: Արշավին մասնակցելու համար կարևոր է լինել լիովին պատրաստ՝ թե՛ ֆիզիկապես, թե՛ հոգեպես:

Սույն հոդվածի հեղինակային իրավունքը պատկանում է armgeo.am կայքին։ Հոդվածի բովանդակությունը կարող է մեջբերվել, օգտագործվել այլ կայքերում, միայն ակտիվ հղում պարունակելով դեպի սկզբնաղբյուրը:

Աշնանային արշավներ / Ինչպես պատրաստվել

armeniangeographic — Tue, 17 Oct 2023 11:25:52 +0000

Աշնանային արշավներ ասելով գուցե շատերն առաջին հերթին պատկերացնում են անձրև, ցեխ, մռայլ և տհաճ եղանակ։ Բայց իրականությունը լրիվ այլ է։ Աշնանային Հայաստանը յուրօրինակ աշխարհ է, որը բացահայտելու համար պետք է մի փոքր պատրաստվածություն։

Հայաստանում մենք ունենք հնարավորություն ականատես լինել տարվա բոլոր չորս եղանակների փոփոխությանը։ 365 օրերի ընթացքում մենք գարնանը վայելում ենք նորաթուխ խիտ կանաչի և սպիտակ գագաթների համադրությունը, ամռանը՝ 3000 մ և բարձր լեռնային տեսարաններն ու ջրային աշխարհը, ձմռանը՝ ամբողջությամբ ձնածածկ գագաթներն ու դրանց վեհությունը։ Իսկ ի՞նչ է տալիս մեզ աշունը։

Աշնանային արշավների առավելությունները

Որքան էլ աշունն ասոցացվի մշտական անձրևների և դեպրեսիայի հետ, արշավականների համար դա այդպես չէ։ Ավելին, աշունը նույնիսկ կարելի է համարել արշավային կյանքի ամենաակտիվ ընթացքը։ Արշավականներից շատերի համար հատկապես աշունն է ամենտպավորիչ ու իդեալական ընթացքը արշավներ գնալու համար։

Չկան միջատներ

Համաձայնեք, որ անկախ ամառային ջերմացնող եղանակից, երբ կարելի է մտածել, թե քայլում ենք շատ թեթև հագուստով, առավել հաճախ մենք պայքարում ենք չջրազրկվելու , չարևահարվելու, և իհարկե, տարատեսակ միջատներից պաշտապնվելու դեմ։ Արշավականների մի մասը նախընտրում է կրել երկարաթև հագուստ՝ պաշտպանվելով միջատներից և լրացուցիչ արևայրուք ստանալուց, իսկ մի մասն օգտագործում է բազմաթիվ սփրեյներ կամ դեղամիջոցներ միջատների խայթոցներից խուսափելու համար։

Այս իմաստով, աշնանը մենք լրիվ հանգստանում ենք, քանի որ չկան այդքան նյարդայնացնող միջատները, օդն ավելի մաքուր է, իսկ երկարաթև հագուստը ջերմացնում է, պաշտպանելու փոխարեն։

Արշավականներ, արշավականներ և էլի արշավականներ

Քանի որ անձրևային և մի փոքր ցուրտ եղանակը վանում է ոչ արշավականներին, բազմաթիվ տեսարժան վայրերում, ջրվեժների, լճերի մոտ չկան իրենց ընտանեկան ժամանցը և բարձր երաժշտությամբ խնջույք կազմակերպող մարդիկ։ Չկա այնքան շատ աղբ, որ կարելի է հանդիպել ամռանը, հատկապես այն վայրերում, ուր կարելի է հասնել ամենագնաց մեքենաներով։

Իսկ ի՞նչ է փնտրում արշավականը բնության գրկում։ Ճիշտ է, լռություն։ Այս իմաստով, աշնանային երթուղիներում կարելի է հանդիպել մեծամասամբ միայն արշավականների, ովքեր նույնկերպ լուռ և մաքուր պահելով վայելում են բնությունը։

Ձայները

Եթե նույնիսկ դու մտածում ես, որ աշունը դեպրեսիվ է, իսկ քայլել թափվող տերևներով նշանակում է միմիայն ավելի խորացնել դեպրեսիան, միևնույն է, գոնե մեկ անգամ պետք քայլես աշնանային երթուղիներով։ Ջրառատ գետակների շշնջոցը, խշխշացող տերևները կլինեն քո ամենաիրական հակադեպրեսանտները։

Երանգներ

Աշունն այն միակ եղանակն է, որի ընթացքում կարելի է ականատես լինել գույների փոփոխությանը։

Քայլել անտառով ու միաժամանակ նկատել կարմիրի, նարնջագույնի, դեղինի, կանաչի բոլոր երանգները։

Կենդանական աշխարհը

Իսկ ինչպե՞ս կարող է անտառային երթուղին մեզ զարմացնել խորը աշնանը, երբ ծառերը տերևաթափ են լինում։ Պատասխանն ակնհայտ է՝ իր կենդանական աշխարհով։ Արշավականների տեսադաշտն ավելի է ընդլայնվում և նախկին սաղարթախիտ ծառերն այլևս չեն խանգարում նկատել ու հիանալ կենդանական աշխարհով, թռչուններով։

Աշնանային արշավները Հայաստանում

Հոդվածը կարդալու համար սեղմի՛ր նկարին

Ինչպե՞ս հագնվել աշնանային արշավների մասնակցելիս

Առհասարակ արշավային հանդերձանքը, անկախ եղանակային պայմաններից, պետք է լինի շերտերով։ Այստեղ կարող ենք կիրառել նաև ձմեռային արշավնների մյուս գլխավոր կանոնը՝ չթրջվել։ Քանի որ աշնանը եղանակային պայմանները կարող են լինել խիստ անկանխատեսելի, չենք կարող բացառել, որ ջերմացնող արևն ինչ-որ պահի կվերածվի հորդառատ անձրևի։ Ուստի կարևոր է ամբողջ հանդերձանքի ճիշտ ընտրությունը։

Անձրևապաշտպան թիկնոց

Աշնանային արշավների մասնակցելիս անևրապաշտպան թիկնոցը պետք է լինի մեր հանդերձանքի անբաժան մասը։ Ժամանակ խնայելու տեսանկյունից առավել հարմար են պոնչո անձրևպաշտպան թիկնոցները, քանի որ կարելի է շատ արագ անձրևից պաշտպանել ամբողջ մարմինն ու ուսապարկը։ Հակառակ դեպքում, հարկավոր կլինի առանձին մտածել նաև ուսապարկի պաշտպանիչ շերտ ձեռք բերելու մասին։

Սակայն առավել հորդառատ անձրևների ժամանակ երբեմն մեկ անձրևապաշտպան շերտը բավաան չէ։ Ուստի վստահ եղեք, որ ուսապարկում տեղ եք հատկացրել նաև անձրևապաշտպան բաճկոնի համար։

Ջրակայուն կոշիկներ

Խորհուրդ կտանք խուսափել և չգնել այնպիսի արշավային կոշիկներ, որոնք նախատեսված են տարվա բոլոր եղանակների համար։ Աշնանային կոշիկները պետք է պարտադիր լինեն ջրակայուն, քանի որ կատարում են միանգամից երկու գործառույթ՝ պաշտպանում են ոտքերը թրջվելուց և ավելի տաք են պահում ոտքերը։

Ինչպես ընտրել արշավային կոշիկ

Հոդվածը կարդալու համար սեղմի՛ր

Զանգապաններ

Հատկապես խոր աշնանը տեղումներն ավելի հաճախակի են լինում, երբեմն անձրևից վերածվելով ձյան։ Նման իրավիճակում ջրակայուն կոշիկ ունենալն արդեն բավական չէ, քանի որ հորդառատ անձևրի պատճառով ոտքերը միևնույն է կթրջվեն վերևից՝ ջուրը ամբողջ հագուստի վրայով կիջնի և կներթափանցի կոշիկների մեջ։

Իսկ զանգապանները կլինեն հավելյալ պաշտապնություն, քանի որ վերևից ամուր գրկում են ոտքերը։ Իսկ թե ինչպես ընտրել ճիշտ արշավային զանգապաններ, կարող եք կարդալ այստեղ։

Աշունը բնավ միայն անձրևների և մռայլ գույների մասին չէ, հակառակը։ Պարզապես պետք է ճիշտ պատրաստվել աշնանային արշավներին, ունենալ համապատասխան հանդերձանք, և ամենակարևորը, սիրել քաղաքից դուրս կյանքն ու հնարավորինս փորձել ստեղծել մեր հարամարավետության գոտին։

Առաջիկա արշավները

Վերելք Գայլի ականջներ

Վերելք Կալասար

Վերելք Արմաղան լեռ

Վերելք Կալասար և Հերմոնի վանք

Երեք բազեների արահետ

Արշավ դեպի Խոսրովի արգելոցի ջրվեժներ

Արշավ Ծաղկաշատից Սանահին

Լոռվա գյուղերով․ Բգավոր, Սեդվի

Վերելք Արագած / Հարավային գագաթ

Ինչպես պատրաստվել ձմեռային արշավներին

armeniangeographic — Wed, 28 Dec 2022 14:10:43 +0000

Ձմեռային արշավները հնարավորություն են տալիս նորովի բացահայտել մեզ արդեն հայտնի ուղղությունները։ Մինչ շատ մարդկանց շրջանում թյուր կարծիք է տարածված, որ ձմռանն արշավններ չեն կազմակերպվում կամ որ ձմեռային արշավներին մասնակցելու համար հատուկ պատրաստվածություն է պետք, փորձառու արշավականներն ու համարձակները վայելում են իրական ձմեռն ու աննկարագրելի տեսարանները:

Ձմեռային արշավներ

Արշավներին մասնակցելու համար կարևոր է ոչ թե տարվա եղանակը, այլ արշավականների պատրաստվածությունը՝ գույք-հանդերձանքի տեսանկյունից։

Անկախ մարդկանց նախընտրություններից և այն կարծրատիպերից, որ ձմռանը հնարավոր չէ վայելել ցրտաշունչ եղանակը, այնուամենայնիվ ձմեռային արշավներն ունեն մի շարք առավելություններ։

Ձմեռային արշավների առավելությունները

Ձմեռային արշավների առաջին ու ակնհայտ առավելությունը հենց ցուրտ եղանակային պայմաններն են։ Կա թյուր կարծիք, որ ձմռանը մշտապես սահմռկեցուցիչ ցուրտ է, սակայն այդպես չէ։ Ձմեռային արշավների ժամանակ, հատկապես երբ շուրջբոլորդ ձյուն է, շատ հաճախ այնքան տաք է, որ կարելի է քայլել նույնիսկ միայն թերմոներքնազգեստով, ֆլիսով և նույնիսկ կիսաթև շապիկով։

Ձմեռային արշավներ

Բացի այդ, ձմռանը չկա կիզիչ արև, օդում պտտվող և նյարդայնացնող միջատներ, իսկ սեզոնային ալերգիա ունեցող մարդկանց համար ձմեռային արշավներն ուղղակի փրկություն են։

Ոչ մարդաշատ երթուղիներ

Ձմեռային արշավների առավելություններից գլխավորն անշուշտ ոչ մարդաշատ երթուղիներն են։ Եթե ամառային արշավների ժամանակ մի ուղղությամբ կարող են քայլել մի քանի արշավախմբեր, ապա ձմռանն այդպես գրեթե չի լինում։

Ձմեռային արշավներ

Բացի այդ, ձմեռային երթուղիներում առավել հեշտ նկատելի է կենդանական աշխարհը, քանի որ ձյան վրա մնացող հետքերը միանգամից նկատելի են։

Տեսարաններ

Կլինի դա քայլարշավային երթուղի, թե ձմեռային վերելք, միևնույն է, տեսարանները միշտ ավելի տպավորիչ ու հզոր են լինում։ Եվ քանի որ երթուղիները մարդաշատ չեն, իսկ տեսարաններն էլ աննկարագրելի գեղեցիկ՝ հիշարժան լուսանկարներ ստանալն ավելի է հեշտանում։

Ձմեռային արշավներ

Իսկ եթե նույնիսկ բարձրացած լեռներն այնքան էլ բարձր չեն, միևնույն է, կարելի է հայտնվել ամպերից վեր ու զգալ 5000+ լեռան գագաթին։

Լռություն

Երթուղիներում լռությունն ուղղակիորեն կապված է ոչ մարդաշատ լինելու հետ։ Ձմռանը, թե՛ բնությունը, թե՛ կենդանական աշխարհն ավելի պասիվ են։

Ձմեռային արշավներ

Շուրջբոլորը քո խմբից դուրս դժվար է հանդիպել այլ շնչավոր էակների։ Քաղաքի առօրյայից կտրվելու, մտքերը կարգի բերելու համար ձմեռային արշավները լավագույն են։

Ֆիզիկական ակտիվություն ամբողջ տարվա ընթացքում

Արշավները լավագույն տարբերակն են, եթե ցանկանում եք համատեղել հաճելին ու օգտակարը։ Շատերը մարզասրահ գնալու փոխարեն նախընտրում են զբաղվել որևէ սպորտաձևով։

Ձմեռային արշավներ

Եվ չնայած ձմեռային արշավային ուղղությունները համեմատաբար ավելի թեթև են լինում, սակայն ձյան առկայության դեպքում ֆիզիկական ծանրաբեռնվածությունն ավելի շատ է։ Բացի այդ, համաձայնեք, որ բնության գրկում լինելն ավելի հաճելի է, քան օրն անցկացնել մարզասրահում։

Ձմեռային արշավների հիմնական երկու կանոնները

Չնայած արշավների ժամանակ պետք է հետևել մի շարք կանոնների, ինչպես օրինակ՝ քայլել շարքով, խմբից չառանձնանալ և այլն, սակայն դրանից զատ, կան նաև երկու այլ հիմնական կանոններ, որոնք կապված են ձմեռային հանդերձանքի հետ։ Այս կանոններին հետևելով ցանկացած ձմեռային արշավ կանցնի ավելի հաճելի։

Չթրջվե՛լ

Ձմեռային արշավների մասնակցելուց առաջ առաջին բանը, որ մտածում ենք ձմեռային համապատասխան հագուստ ունենալն է, որը մեզ տաք կպահի։ Սակայն մոռանում ենք, որ ձմեռային արշավային հանդերձանքը պետք է լուծի միանգամից երկու խնդիր՝ մարմինը պահել տաք և, իհարկե, չոր։ Այո, արշավային հանդերձանքը պետք է նաև պաշտպանի մարմինը թրջվելուց։

Բանն այն է, որ ջուրը մարմնի տաքությունը հեռացնում է 25 անգամ ավելի արագ, քան օդը։ Այսպիսով՝ պարզապես մրսելն ավելի տանելի է, քան քրտնելն ու մրսելը։

Հագնվել շերտերով

Չթրջվելու հարցում օգնության է գալիս արշավային մեկ այլ կարևոր կանոն՝ հագնվել շերտերով։ Արշավային հանդերձանքում առանձնացնում են երեք հիմնական շերտ՝

Հիմնական կամ թերմո շերտ

Չոր և տաք մնալու համար պետք է ճիշտ ընտրել հանդերձանքը և պետք է սկսել թերմոներքնազգեստից։ Այն պարտադիր համարվող շերտերից առաջինն է, քանի որ քայլելու ընթացքում արտադրված քրտինքը հեշտությամբ հեռացնում և պահում է մարմնի ջերմաստիճանը։

Թերմոներքնազգեստ

Շնորհիվ թերմոներքնազգեստի գործվածքի, այն արագ հեռացնում է խոնավությունը և մարմինը չոր պահում։ Այսպիսով՝ ձեռք բերելով թերմոներքնազգեստ, մենք կանխում ենք մարմինը թրջվելուց։

Միջին կամ ֆլիսե շերտ

Ճիշտ թերմոներքնազգեստ ընտրելուց հետո, պետք է ձեռք բերել ֆլիս և թեթև բաճկոն։ Այս շերտի նպատակը հնարավորինս ջերմություն ապահովելն է։

Ֆլիս

Չնայած ֆլիսի և թեթև բաճկոնի փոխարեն կարելի է միանգամից ընտրել մեկ հաստ բաճկոն, սակայն ֆլիսն ու թեթև բաճկոնն ավելի նախընտրելի են, քանի որ կարող եք առավել հեշտ հարմարվել եղանակային փոփոխություններին։

Ջրակայուն և քամապաշտպան շերտ

Երրորդ շերտն արդեն ուղղակիորեն կախված է արտաքին գործոններից և պետք է պաշտպանի մեզ քամուց ու թրջվելուց։ Ահա այդ պատճառով էլ, այս դեպքում պետք է նախընտրությունը տալ ջրակայուն և քամապաշտպան բաճկոններին։

Արշավական բաճկոն

Քամապաշտպան լինելն նույնքան կարևոր է, որքան ջրակայուն լինելը: Քանի որ ինչպես թրջվելը կարող է վատ հետևանքներ ունենալ, այնպես էլ քամին։

Ամփոփելով հոդվածի այս հատվածը հիշենք, որ ձմռանն արշավելը կարող է ավելի հաճելի լինել, քան ամռանը։ Իսկ հանդերձանք ընտրելիս յուրաքանչյուր շերտ պետք է նպաստի մեր չոր ու տաք մնալուն։ Հագուստի ճիշտ ընտրությունը մեզ զերծ կպահի ցրտահարությունից և հիպոթերմիայից։

Ինչպես հագնվել ձմեռային արշավների մասնակցելիս

Չնայած արշավային հանդերձանքի ամենակարևոր մասն էին կազմում երեք հիմնական շերտերը, սակայն չմոռնանաք նաև հանդերձանքի մյուս տարրերի մասին։ Ոչինչ բաց չթողնելու համար, սկսենք արշավային կոշիկներից և կվերջացնենք արշավային գլխարկով։

Արշավային կոշիկ

Արշավային կոշիկները արշավային հանդերձանքի այն կարևոր մասն են կազմում, որը հորդորում ենք ձեռք բերել նույնիսկ սկսնակներին։

Արշավային կոշիկները լինում են շատ տարբեր՝ սկսած սովորական արշավնայինից մինչև բարդ ալպինիստական։ Այդ մասին ավելի մանրամասն մեր հոդվածում։