Օդունջուլար (նախկին Բորյան) գյուղով քայլում էինք դեպի Գրգուռի գագաթ։ Խումբը շարժվեց առաջ։ Ես գյուղի կենցաղով տարված լուսանկարելով մտա մի բակ, որտեղ 10 տարեկան տղան այնպես էր խփում ոչխարներին, որ կես մետր շառավղով փոշի էր դուրս գալիս։
Հայերեն ասեցի.

– արա մեղք են, ո՞ւր ես տենց խփում էդ հարիֆներին։

Բնականաբար, չհասկացավ ինչ եմ ասում, բայց փորձեցի ժեստերի լեզվով բացատրել ու ձեռքով ցույց տվեցի ձեռնափայտին (կոպալ)։ Այն նման չէր մեր գյուղերում կիրառվողներին։

Օդունջուլար գյուղը գտնվում է Գրգուռի լանջին (նախկինում կոչվում էր Բորյան)

Կոպալը

Պատկերացրի կոպալը գրասենյակիս պատին, որպես հուշ Գրգուռի պատմական վերելքից։ Բութ մատս վերև պարզած ասեցի.

– չոք գյոզալ կոպալ աբի ջան:

Տղան ժպտաց ու մեջքն ուղղելով հաստատեց։ Ժեստերի լեզվով բացատրեցի, որ ես իրեն փող կտամ, եթե նա կոպալն ինձ տա։ Ոչխարները շունչները պահեցին։ Ձյունն ուժեղ անդրադարձնում էր արևը։ Որպես մեկնարկային գին տղան հնչեցրեց 10 լիրան։ Միանգամից հանեցի պարզեցի փողը։ Ոչխարներն արտաշնչեցին։ Տղան ձեռքով հասկացրեց, որ համաձայն չի։ Ոչխարները կրկին շունչները պահեցին։ Առաջարկեցի 20, հետո 30 լիրա։ Որքան շատ գումար էի առաջարկում, այդքան ավելի շատ էր տղան կապնվում իր կոպալի հետ, որը մինչև այդ պահը նրա համար ոչ մի արժեք չէր ներկայացնում։ Հանեցի 10 դոլար ու ասեցի, որ սա ամենաշատն է ինչ ես պատրաստ եմ վճարել կոպալի համար։ Երեխայի «ոչ»-ը հստակ էր։ Ափսոսանքով հեռացա։ Ոչխարները շարունակեցին ծեծ ուտել վաղաժամ ուրախանալու համար։

Դեպի Գրգուռ լեռ

Վերելք Գրգուռ լեռ

Հասա խմբին ու պատմեցի, որ շատ սիրուն կոպալ էի տեսել, որ 10 դոլար առաջարկեցի՝ երեխեն չտվեց, ասեցին, -դե եթե տար տանը ծեծ կուտեր ծախելու համար։ Ասեցի, -հակառակը, տանը ծեծ ա ուտելու, որ չի ծախել։ Մի տեսակ համոզված էի, որ վերադառնանք գյուղ կոպալը ինքը կգա կգտնի ինձ։ Այդպես էլ եղավ։ Հասանք մեքենաների մոտ ու մեզ դիմավորեցին բազմաթիվ երեխաներ՝ կոպալը ձեռքներին։ Հասկանալի էր, որ երեխան պատմել էր իր հետ տեղի ունեցածը։ Եկել էր սխալն ուղղելու։ Գործարքից հետո կոպալը դրեցի մեքենայի մեջ, ու մի երիտասարդի հրավերով գնացինք իրենց տուն։

Հյուրասիրություն Օդունջուլար գյուղում

Պապիկի կոպալը

Տանը ծանոթացանք 100 տարեկան պապիկի հետ։ Թեյ խմեցինք ու դուրս եկանք միջանցք, որպեսզի հետ հագնենք մեր կոշիկները, որոնք հանել էինք դռան շեմին։

Գյուղի ամենատարեց մարդը

Պատին հենված էր ավելի գեղեցիկ կոպալ։ Կրկին բութ մատս տնկած ցույց տվեցի հիացմունքս։ Թոռը սկսեց հետս բանակցություններ վարել։ Ես հրաժարվում էի առնել պապիկի կոպալը, բայց միևնույն ժամանակ այդ միտքն ինձ զվարճացնում էր, թե ինչպես է թոռը 100 տարեկան պապու կոպալը փորձում վաճառել ինձ։ Երկրորդն էլ վերցրի։ Գյուղում լռություն տիրեց։ Երեխեքը ցրվեցին տներով։ Քիչ անց վաճառքի էին հանվել գյուղի բոլոր կոպալները։

Վերջում նկարվեցինք մեր կոպալների հետ

Գյուղի տարեցներից մեկը հասկացավ, թե ինչ է կատարվում և արգելեց բոլորին մեզ վրա կոպալ վաճառել։ Իր սեփական կոպալն էլ ինձ նվիրեց։

Գրգուռի կոպալը

Ի վերջո 4 կոպալով հեռացանք գյուղից։ Հուսանք Գրգուռի լանջի անտառի ամեն ծառն այսուհետ չի դիտարկվի որպես 10 դոլարանոց կոպալ։

Տիգրան Վարագ

Սույն հոդվածի հեղինակային իրավունքը պատկանում է armgeo.am կայքին։ Հոդվածի բովանդակությունը կարող է մեջբերվել, օգտագործվել այլ կայքերում, միայն ակտիվ հղում պարունակելով դեպի սկզբնաղբյուրը:

Ճանապարհորդական բլոգ

Մասիսի բարձրությունը՝ 5165 թե՞  5137

Արարատ լեռ

Հայաստանի լեռները որպես մարդիկ

Կիլիմանջարո. Աֆրիկայի «կտուրին»

Mediamax-ի հարցազրույցը Տիգրան Վարագի հետ

Հայկական լեռնաշխարհի «7 գագաթ» նախագիծ

Տիրինկատար և «Վիշապների հովիտ»

5165-ի սրտում ծնված երազանքի ճանապարհը

Հայաստանի 5 ամենագեղեցիկ գարնանային ուղղությունները

Դուք արդեն ձեռք եք բերել արշավային կոշիկ, բաճկոն, ուսապարկ, տաբատ, սակայն պետք չէ մոռանալ նաև ձեռնոցների կարևորության մասին: Հիշե՛ք, որ հիպոթերմիայի ժամանակ մարմինը սկսում է ցրտահարվել հենց վերջույթներից: Այնպես որ ձեռքերի գրագետ պաշտպանությունը ցրտից չափազանց կարևոր է: Թեև այս հարցն ավելի հեշտ է, քան կոշկի և ուսապարկի ընտրությունը, այնուամենայնիվ, կան մի քանի նրբություններ, որոնք պետք է իմանալ արշավային ձեռնոց ընտրելիս։

Ձեռնոցը կատարում է երկու գործառույթ՝ պաշտպանական և ջերմացնող:

Ժայռամագլցման ու քարանձավախուզության ժամանակ, կամ պարզապես ամռանն արշավի մասնակցելիս կարելի է հագնել մատները կտրած բարակ կտորից ձեռնոցներ պաշտպանական ներդիրներով: Կհամապատասխանեն հեծանվորդի ձեռնոցները, կամ այնպիսի ձեռնոցներ, որոնք կրում են հատուկ ջոկատայինները: Դրանք կպաշտպանեն ձեր ձեռքերը քերծվածքներից և արևահարումից:

Արշավային ձեռնոց

Իսկ ձեռքերը ցրտից, քամուց և թրջվելուց պաշտպանելու հարցին ավելի լուրջ է պետք մոտենալ: Նախ ցանկալի է ունենալ մի քանի տարբեր հաստության ձեռնոց: Մեկ զույգ ֆլիսե, կամ նման այլ նյութից (օրինակ սոֆթշել) բարակ ձեռնոց՝ որպես առաջին շերտ: Սա պետք է որոշակի տաքություն ապահովի, բայց լինի փափուկ և բարակ, որպեսզի չկաշկանդի ձեր մատների շարժունակությունը, և դուք կարողանաք տարբեր գործողություններ կատարել: Ցանկալի է, որ այս ձեռնոցները լինեն ջրից որոշակի պաշտպանությամբ, որպեսզի խոնավ մակերեսներին և ձյանը դիպչելիս միանգամից չթրջվեն:

Տաք արշավային ձեռնոցներ

Հաջորդը վերցնում ենք հաստ և չափազանց տաք ձեռնոց՝ հատուկ ցուրտ պայմաններում կրելու համար: Հաճախ լինում են երկշերտ և միմյանցից առանձնացվող: Ներքին շերտը կարող է լինել փետուրե, բրդյա, ֆլիսե կամ այլ սինթետիկ մեկուսիչով, իսկ արտաքինը՝ պոլիէսթերի ջրակայուն շերտով, հաճախ պատահում է կաշվից, կորդուրայից և այլ ամուր գործվածքներից: Ձեռնոցներն ունենում են հետևյալ հնարավորությունները, որոնք ցանկալի է առկա լինեն․

• Մեմբրանե շերտի առկայություն
• Կաշվե ուժեղացումներ ափի մեջ, կոճերի հատվածում՝ վնասվածքներից հավելյալ պաշտպանության համար
• Բացվող շղթաներ, որոնց տակ կա ցանց, որը շոգ եղանակին ուժեղացնում է օդափոխությունը
• Ձեռնոցները ձեռքերից կախելու համար թելեր, որպեսզի անհրաժեշտության դեպքում հանեք և ձեռքերից կախած պահեք, ամեն անգամ ուսապարկի մեջ հանել-դնելու փոխարեն:
• Ցուցամատի և բթի վրա հատուկ շերտ, որի հանդեպ սմարտֆոնների էկրանները զգայուն կլինեն: Այսպիսով դուք հաստ ձեռնոցով կկարողանաք օգտվել ձեր հեռախոսից:

Թաթմաններ

Վիճելի հարց է, թե ո՞րն է ավելի լավ՝ տաք ձեռնոցը, թե՞ թաթմանը: Դե… երկուսն էլ ունեն իրենց լավ և վատ կողմերը: Պետք է ընտրել ըստ նշանակության:

Թաթմաներն էլ են լինում տարբեր՝

• բարակ ֆլիսե թաթմաններ,
• թեթև, բայց չափազանց տաք, փետուրե թաթմաններ,
• ջրակայուն շերտով, կոշտ թաթմաններ

Թաթմանի առավելությունը ձեռնոցի հանդեպ այն է, որ բոլոր մատներն ընդհանուր տարածքում են և ազատ, ոչ մի բան դրանց չի սեղմում և այդպիսով ավելի տաք են մնում: Այդ պատճառով կարելի է ավելի հաստ թաթման ընտրել, ավելի շատ ջերմամեկուսիչ լցոնումով: Սակայն թաթմանով ոչ մի աշխատանք չես կարող անել, բացի թրեքինգյաին փայտիկները կամ, օրինակ, սառցահատը բռնելուց: Դրա համար թաթմանի տակից պետք է հագնել համեմատաբար թեթև, բայց կրկին տաք ձեռնոց: Որպեսզի անհրաժեշտության դեպքում թաթմանը կարողանաք հանել և ձեռնոցով աշխատանք կատարել:

Հայաստանյան արշավների ժամանակ, անգամ ձմռանը (մինչև 3000մ), չեն հանդիպում այնպիսի պայմաններ, որտեղ թաթմանների անհրաժեշտություն լինի: Դրա կարիքը կարող է լինել, եթե դուք օրացույցային ձմեռով գնում եք Արագած, կամ Աժդահակ: Մնացած դեպքերում ամուր, ջրակայուն և տաք ներդիրով ձեռնոցը պետք է լիովին բավարար լինի:

Թաթման կաորղ է պետք գալ ինչպես Արարատի, այնպես էլ ավելի բարդ վերելքների ժամանակ։ Ամեն դեպքում փետուրե թաթմանները նախատեսված են էքստրեմալ սառը պայմաններում բարձրլեռնային վերելքենրի համար: Խորհուրդ կտանք վերցնել ավելի բարակ, բայց պինդ գործվածքով թաթման, որը հնարավոր կլինի հագնել այլ ձեռնոցի վրայից:

Անկախ նրանից, թե ինչ արշավային ձեռնոց և թաթման կվերցնեք, միշտ ունեցեք փոխնորդ ձեռնոց, քանի որ թրջվելու դեպքում ձեռնոցը հաշված րոպեների ընթացքում կցրտահարի ձեր ձեռքերը:

Սույն հոդվածի հեղինակային իրավունքը պատկանում է armgeo.am կայքին։ Հոդվածի բովանդակությունը կարող է մեջբերվել, օգտագործվել այլ կայքերում, միայն ակտիվ հղում պարունակելով դեպի սկզբնաղբյուրը:

Արշավային գույք և հանդերձանք

Արարատի վերելքին անհրաժեշտ պարագաների ցանկ

Մեկօրյա արշավին անհրաժեշտ պարագաների ցանկ

Ինչպես պատրաստվել գիշերակացով արշավներին

Տեխնիկական վերելքին անհրաժեշտ պարագաների ցանկ

Ջրաման, թե՞ պլաստիկ շիշ

Ինչպես ընտրել արշավային գլխարկ

Ինչպես լիցքավորել գաջեթներն արշավների ժամանակ

Արշավային լապտեր

Արշավային գուլպաներ

Կոշիկն արշավականների հանդերձանքի կարևորագույն մասն է՝ հարմարավետ և անվտանգ քայլքի համար: Այն բարեհաջող արշավի գլխավոր գրավականն է: Սկսնակներին բարդ է լինում կողմնորոշվել շուկայի բազմազանության մեջ: Այսօր արտադրվում են ամենատարբեր տեսակի և նշանակության արշավային կոշիկներ՝ շատ մեծ որակային և գնային տարբերություններով:

Այս խառնաշփոթի մեջ ճիշտ կողմնորոշվելու համար որոշեցինք պատրաստել այս նյութը, որտեղ փորձեցինք անդրադառնալ հարցի ամենակարևոր կետերին՝ բացատրելով հիմնական սկզբունքները, որոնցով պետք է առաջնորդվել արշավային կոշիկի ընտրության հարցում։

Եվ այսպես, ինչպիսի՞ն պետք է լինի ձեր արշավային կոշիկը: Այս հարցի լուծումը զգալիորեն կհեշտանա, եթե դուք անկեղծ պատասխանեք հետևյալ հարցերին.  Ինչ բարդության երթուղիներով եք պատրաստվում քայլել: Որքան բարդ է երթուղին` կտրատված ռելիեֆով, քարքարոտ կամ ցեխոտ հատվածներով է, թե ոչ: Որքան բարդ է երթուղին, այնքան ամուր և բարձր ճիտքով պետք է լինի կոշիկը, որպեսզի պինդ պահի կոճերն ու սրունքը:

Որքան ծանր է լինելու ձեր ուսապարկը: Ծանր ուսապարկը լրացուցիչ ճնշում է ստեղծում ոտնաթաթերի վրա և դեֆորմացնում կոշիկի տակացուն, ինչը կարող է բացասական ազդել կոշիկի՝ ռելիեֆի հետ կպչողունակության վրա: Այդ իսկ պատճառով որքան ծանր է ձեր ուսապարկն, այնքան հաստ և ամուր տակացու պետք է ունենա կոշիկը:

Ինչ մարզավիճակում եք դուք գտնվում։ Հատկապես կարևոր է այս հարցում ոտքի մկանային և ջլային հյուսվածքների մարզվածությունը: Որքան մկանոտ և էլաստիկ ջլեր ունեն ձեր ոտքերն, այնքան քիչ օժանդակ ֆիքսացիայի կարիք ունեն ձեր կոշիկները: Այդ իսկ պատճառով դուք կարող եք տեսնել փորձառու և մարզված արշավականներին թեթև բոթասներով, քանի որ նրանց ոտքերի հյուսվածքները պինդ են և մարզված: Սկսնակներին խորհուրդ չի տրվում նման կոշիկներով արշավել, քանի որ վնասվածքներ ստանալու ռիսկը նրանց մոտ մեծ է:

Պատասխանելով այս հարցերին դուք արդեն քիչ թե շատ պատկերացում կկազմեք ձեր ապագա կոշիկի մասին:

Արշավային կոշկների տեսակները

Պայմանականորեն արշավային կոշիկները կարելի է բաժանել երեք խմբի՝

• Թեթև քայլարշավային կոշիկներ (անգլ. “hiking boots”)
• Թրեքինգային կոշիկ (անգլ. “trekking boots”)
• Ալպինիստական կոշիկ (անգլ. Mountaineering boots)

Բնականաբար այս բաժանումը պայմանական է և դրանց միջակայքում կան շատ ենթատեսակներ: Բայց որպեսզի չխճճվենք տեղեկատվության գերհագեցվածության մեջ՝ կառաջնորդվենք այս դասակարգմամբ:

Թեթև քայլարշավային կոշիկներ

Թեթև քայլարշավային կոշիկները նախատեսված են հանգստյան օրերի կարճատև քայլարշավների համար, որոնք անցնում են պարզ, ոչ շատ կտրտված ռելիեֆով: Սրանց ճիտքը շատ բարձր չէ, պաշտպանում է միայն կոճի մի մասը, տակացուն համեմատաբար փափուկ է, որպես ամորտիզացիոն շերտ օգտագործվում է EVA փրփուրից ներդիրներ, որն ընդունում է կրողի ոտնաթաթի ձևը՝ ապահովելով մաքսիմալ հարմարավետություն:

Քայլարշավային կոշիկ

Այսպիսի կոշիկները չեն առանձնանում ամրությամբ և երկարակեցությամբ, նախատեսված չեն երկարատև, ծանր ուսապարկով թրեքինգների համար: Շատ հաճախ վերևի հատվածը պատրաստված է լինում ցանցանման կտորից: Այս ամենից կոշիկը դառնում է թեթև և հարմարավետ, այն լավ է շնչում և հարմար է շոգ եղանակին արշավի գնալու համար: Սակայն այս ամենի հետ մեկտեղ տուժում են պաշտպանական գործառույթները՝ ավելի վատ է պահում ջուրը և բարդ քարքարոտ տեղերում քայլելիս շատ արագ շարքից դուրս է գալիս: Ամեն դեպքում ցածր գնի պատճառով շարունակում են հանդիսանալ ամենապահանջվածն ու տարածվածը հայաստանյան շուկայում:

Թրեքինգային կոշիկներ

Սա բավականին մեծ դաս է, այսպիսի կոշիկները կարող են միմյանցից շատ տարբերվել և նախատեսված լինել տարբեր նպատակների համար: Բայց բոլորին միավորում է մի քանի հստակ հատկություն, որոնք կփորձենք հակիրճ ներկայացնել:

Նախ այս տեսակի կոշիկների ճիտքն ավելի բարձր է, ամբողջությամբ գրկում է կոճերը, և մասամբ կամ ամբողջությամբ՝ սրունքը՝ կախված մոդելից: Սրանց տակացուն լինում է բազմաշերտ: Կոշտ և փափուկ մի քանի շերտեր հաջորդում են իրար, որպեսզի ստեղծեն ամրության, հարմարավետության և գետնի հետ կպչողունակության լավագույն համադրությունը: Քանի որ այս կոշիկները օգտագործվում են ավելի էքստրեմալ պայմաններում և մեծ ծանրաբեռնվածությամբ, նրանց տակացուները պետք է լինեն ամենաորակյալն ու ամուրը: Տակացուներ արտադրող առաջատար ընկերությունը աշխարհում “Vibram”-ն է: Կան մի քանի բացառություններ՝ օրինակ Salomon բրենդն ունի իր սեփական մշակման “Contragrip” տակացուները, որոնք նույնպես հրաշալի կպչողունակություն են ապահովում:

Conagrip-ը հաճախ օգտագործվում է թրեյլրանինգի, սքայրանինգի մրցումներում իր թեթև քաշի և առավել ինֆորմատիվ լինելու համար: Vibram-ի տակացուները շատ ամուր են, չեն սահում և ապահովում են ամուր կպչողություն գետնի հետ: Կախված կոշիկի մոդելից բազմաշերտ հատուկ համակցությունն ապահովում է իդեալական հարմարավետություն և անվտանգություն: Միշտ ընտրեք այնպիսի կոշիկ, որի տակացուն լինի Vibram կամ Salomon՝ իր Contagrip-ով:

Salomon տակացուներ / լուսանկարը՝ e-outdoors.co.uk

Թրեքինգային կոշիկները կարվում են հիմնականում կամ կաշվից, կամ զամշից, կամ այս երկուսի համադրությամբ: Տեքստիլից և ցանցից կարված թրեքինգային կոշիկներ գրեթե չեն հանդիպում, քանի որ այստեղ ամրությունը և դիմացկունությունը առաջնահերթ է: Ընդհանրապես հիշե՛ք հետևյալ սկզբունքը․ որքան քիչ կարեր լինեն, որքան միատարր լինի կոշիկը, այնքան ավելի ամուր, ջրադիմացկուն ու երկարակյաց կլինի այն: Տարբեր տեսակի կտորներով և ցանցերով միմյանց կարկատած կամ սոսնձված կոշիկները, թեև ավելի թեթև են լինում, հարմարավետ և էժան, սակայն ավելի վատ են պաշտպանում ոտքերը խոնավությունից և շուտ են մաշվում:

Այստեղ պետք է առաջնորդվել, թե ինչ նպատակով եք գնում այն: Թրեքինգային կոշիկների մեջ, որպես ամորտիզացիոն շերտ, տակացուից հետո օգտագործվում է առավել խիտ EVA փրփուր, կամ պոլիուրետան, որը ավել կոշտություն և ամրություն է հաղորդում կոշիկի հիմքին՝ չթողնելով նրան դեֆորմացվել բարդ ռելիեֆով քայլելիս:

Արշավային կոշիկներ

Վերջինը հանդիպում է առավել բարձր դասի կոշիկներում, որոնցից պահանջվում է մաքսիմալ ամրություն: Այս կոշիկները ավելի թանկ են: Որպես կանոն, դրանց գինը սկսվում է 200-300 դոլլարից: Եթե դուք պլանավորում եք հաճախ մասնակցել արշավների և գնալ երկարատև թրեքինգների վայրի ճանապարհներով, որոնք խնամված արահետներից դուրս են, և եթե ձեր ուսապարկը հաճախ է հասնում և անցնում 20 կիլոգրամը, ապա այս կոշիկները ձեր համար են:

Ալպինիստական կոշիկներ

Սրանք բաժնվում են իրենց հերթին միաշերտ և բազմաշերտ տեսակների: Միաշերտները նախատեսված են մինչև 5000 մետր բարձրության լեռների համար (ամառային Էլբրուսը նրանց առավելագույնն է): Բազմաշերտերը նախատեսված են արդեն բարձր լեռնային ալպինիզմի համար 6-7000 մ+ բարձրության բարդ լեռնագագթներ հասնելու համար: Նրանց մեջ օգտագործված են ամենաթարմ տեխնոլոգիաներն ու լավագույն թանկարժեք նյութերը, ինչի պատճառով էլ նրանց գինը հաճախ կարող է հասնել 1000 դոլլարի և անցնել:

Ալպինիստական կոշիկներ

Բոլոր ալպինիստական կոշիկներն ունեն մաքսիմալ ամուր կմախք, հաճախ օգտագործվում են մետաղական թիթեղներով լրացուցիչ ամրացումներ, նրանց կապիչները հատուկ ձևով են նախագծված, որպեսզի ֆիքսեն ոտքը բոլոր կարևոր հատվածներում: Դիմացից և ետևից ունեն հատուկ ամրակներ (ռանտեր) ալպինիստական կատվիկներ ամրացնելու համար: Այս կոշիկները ծանր են լինում, յուրաքանչյուրի քաշը կարող է գերազանցել մեկ կիլոգրամը: Այդ իսկ պատճառով նման կոշիկները հարմար կլինեն բարձրլեռնային վերելքների համար:

Հիմա, երբ մենք իմացանք կոշիկների հիմնական տեսակները, կբացատրենք նաև մի քանի ընդհանուր բան, որոնք պետք է իմանալ արշավային կոշիկ ընտրելիս:

Ինչ է մեմբրանը

Մեմբրանները հատուկ մշակված պոլիմերային նյութեր են, որոնց մոլեկուլների միջև խտությունն այնպես է արված, որ քրտինքի գոլորշիները կարողանան դուրս գալ, բայց և առավել մեծ մոլեկուլներ ունեցող ջրային կաթիլները ներս չանցնեն: Սրա շնորհիվ կոշիկը, հագուստը, կամ ցանկացած այլ իր, որտեղ օգտագործվում է մեմբրան, ստանում են առաջին հայացքից միմյանց հակասող հատկություններ՝ միաժամանակ ապահովում են և՛ ջրակայունությոն, և՛ չեն քրտնեցնում:

Մեմբրաններ արտադրող ամենահայտնի ընկերությունը  Gore-Tex-ն է: Նրա արտադրանքը օգտագործվում է ամբողջ աշխարհով մեկ արտադրվող հանդերձանքի և գույքի մոտավորապես 80%-ում: Նշված բոլոր տեսակի կոշիկներն էլ արտադրվում են մեմբրանով: Սա պարտադիր պայման է հանդիսանում ցանկացած կատեգորիայի արշավ գնալու համար:

Նոր կոշիկով չգնա՛ք արշավ:

Նոր գնված կոշիկը պատրաստ չէ արշավ գնալու համար: Այն կոշտ է լինում, լավ չի նստում ոտքին և հարում է կրունկներն ու մատները: Պետք է այն մի քանի օր կրել քաղաքում, քայլել, որպեսզի կոշիկը մի փոքր փափկի և հարմարվի ձեր ոտնաթաթին՝ ընդունելով նրա ձևը: Սա հատկապես վերաբերվում է կոշտ, ծանր կոշիկներին:

Ինչպես ընտրել ճիշտ չափսը և ձևը

Այստեղ ճիշտ չափս ընտրելը չափազանց կարևոր է, քանի որ սխալ կոշիկը կարող է լուրջ վնասել ձեր ոտքը: Եթե կոշիկը շատ մեծ լինի, ապա ոտնաթաթը չի ֆիքսվի կոշիկի մեջ և կոլորվի, եթե փոքր լինի՝ կհարվի, կլինեն վերքեր, իսկ իջնելիս եղունգները կարող են հարումից կոտրվել: Իսկ կոտրված եղունգը, հավատացեք, շատ երկար է վերականգնվում: Միշտ նախապատվությունը տվեք մի փոքր մեծ չափսին, եթե ընտրության առջև եք կանգնած: Երկարատև քայլքից հետո ոտնաթաթերը արյան ակտիվ շրջանառության և ծանրաբեռնվածության պատճառով կարող են այտուցվել և փքվել: Արդյունքում, եթե կոշիկը լինի ոտքի ճիշտ չափսով, կամ առավել ևս մի քիչ փոքր, ապա փքվելով ոտնաթաթը սեղմվելու է և հանգեցնի նույն հետևանքներին:

Արշավային կոշիկներ

Ցանկալի է կոշիկ ընտրելու գնալ երեկոյան: Օրվա այդ ժամերին ոտնաթաթը սովորաբար ուռած է լինում, միգուցե մի փոքր այտուցված: Այդպիսով, դուք կընտրեք այն չափսը, որն ավելի ճիշտ կհամապատասխանի դաշտային պայմանների իրականությանը: Վերցրեք ձեզ հետ մի քանի զույգ տարբեր հաստության գուլպաներ: Փորձեք բոլոր գուլպաներով, որովհետև դուք այն հաստատ հագնելու եք թե՛ ամառային եղանակին, թե՛ փոքր-ինչ ցուրտ եղանակին, երբ արդեն անհրաժեշտ են լինելու հաստ գուլպաներ:

Մի շտապեք ընտրություն կատարել, տարբեր մոդելներ փորձեք: Հնարավոր է, որ անգամ նույն բրենդի տարբեր մոդելների միևնույն չափսը տարբեր ձև նստի ձեր ոտքին: Հագե՛ք կոշիկը և քայլեք խանութում, փորձեք աստիճաններով բարձրանալ և իջնել: Հանդերձանքի խանութներում լինում են հատուկ պլատֆորմներ՝ քարերով պատրաստված, որոնց վրա քայլելով կարող եք զգալ, թե ինչպես է կոշիկն իրեն դրսևորում լեռներում քարերի վրա: Մի ամաչեք փորձել տարբեր մոդելներ և երկար քայլել դրանցով:

Հիշեք, որ կլորիկ գումար եք վճարելու այդ կոշիկի համար:

Սույն հոդվածի հեղինակային իրավունքը պատկանում է armgeo.am կայքին։ Հոդվածի բովանդակությունը կարող է մեջբերվել, օգտագործվել այլ կայքերում, միայն ակտիվ հղում պարունակելով դեպի սկզբնաղբյուրը:

Բլոգ Հայաստանի մասին

Մասիսի բարձրությունը՝ 5165 թե՞  5137

Արարատ լեռ

Հայաստանի լեռները որպես մարդիկ

Կիլիմանջարո. Աֆրիկայի «կտուրին»

Mediamax-ի հարցազրույցը Տիգրան Վարագի հետ

Հայկական լեռնաշխարհի «7 գագաթ» նախագիծ

Տիրինկատար և «Վիշապների հովիտ»

5165-ի սրտում ծնված երազանքի ճանապարհը

Հայաստանի 5 ամենագեղեցիկ գարնանային ուղղությունները